وارث شاہ دی ہیر وچ ایہ حصہ الله دتہ ترگڑ والے دے سودھے ہوئے نسخہ قصہ ہیر رانجھا دے علاوہ کسے ہور نسخے وچ نہیں ملدا یا کم توں کم مینوں نہیں ملیا یا میری نظر توں نیں گزریا ۔ پہلی وار فلم ہیر رانجھا وچ نور جہان دی آواج وچ جدوں ایہ بول سنے تے دل وچ کھب گئے پر اودوں میں چھیویں جماعتے پڑھدا ساں تے حالے میرا کسے ہیر نال واہ نہیں پیا سی فیر جدوں کجھ وڈیرا ہویا تے پنجابی ادبی بورڈ توں ڈاکٹر باقر ہوراں دی سودھیا ہیر رانجھا دا نسخہ ویکھیا تے ایہ بیت نہ لبھے تے میں حریانی نال زاہد حسن تے بعد وچ ڈاکٹر ریاض شاہد ہوراں کولوں پچھیا پئی ایہ حصہ ہیر رانجھے وچ کیوں نہیں تے اوہناں دسیا پئی وارث شاہ دی ہیر وچ کئی الحاقی شعر وی نیں جہیڑے اوہناں نال منسوب نیں تے میں اس گل دا ہور وی قائل ہو گیا پئی وڈے شاعراں دے رنگ وچ جو وی لکھیا جاوے گا اوہ اوہناں دے ناں لگن دے ڈھیر امکان نیں ۔ انج ای جیویں صادق سیالکوٹی دا شعر ：
تندیِ بادِ مخالف سے نہ گھبرا اے عقاب
یہ تو چلتی ہے تجھے اونچا اڑانے کے لیے
ایہ شعر تے کئی ہور غلط طور تے اقبال نال منسوب ہو گئے نیں ۔
پنجابی وچ وارث شاہ ، بلھے شاہ ، شاہ حسین ، خواجہ فرید تے کئی ہور وڈے شاعراں نال وی انج ہویا اے تے کئی شعر اوہناں نال منسوب کیتے گئے نیں ۔ وارث شاہ دے ایہ شعر بعد وچ پتہ چلیا پئی الله دتہ ترگڑ آلے دی سودھی ہیر وچ ملدے نیں ۔ خیر ہن تے وارث شاہ نال منسوب اجیہے الحاقی اشعار بارے تحقیق سٹے ساہنمے آ چکے نیں پر ایہ شعر مینوں عام طور تے پاکستان وچ شادیاں دے موسم وچ بوہت یاد آؤندے نیں ۔ اوہ اس لئی پئی جدوں شادیاں دا سیزن آؤندا اے تے مہندی یاں بارات دا ویلا آؤندا اے تے ہر پاسے فائرنگ ، آتش بازی تے پٹاخے انج چلدے نیں جیویں کوئی دھاڑوی کسے ملک یا علاقے نوں فتح کرن آیا اے یا کوئی جنگ دا میدان اے جتھے اسلحے تے ہتھیاراں نال لڑائی ہو رہی اے یا فیر کوئی ظالم کھیڑا کسے رانجھے دی ہیر نوں طاقت تے ظلم دے زور نال دھک دھگانے کھوہ کے لے جا رہیا اے ۔ممکن اے ایہ میرا وہم ہووے پر تسیں آپے سوچو پئی جے تسیں سب دے ساہمنے گھر آلیاں دی مرضی نال کسے دی دھی بھین نوں ویاہ کے لے جا رہے او تے فیر ایہ تڑ تڑ فائرنگ تے گولا باری دا کیہ تک بندا اے ۔ اتوں جدوں آل دو آلے وچ لوکی ستے ہون یا کوئی بیمار شیمار ہووے یا کوئی پڑھاکو پڑھ رہیا ہووے تے اچانچک گولا باری شروع ہو جاوے تے ایہدا کیہ مطلب ہو سکدا اے ؟ اتوں ڈیک یا لاؤڈ اسپیکر تے اچی واج وچ ادھی ادھی رات تیک گان وجان دا کیہ تک بندا اے ۔ اپنی چار دیواری وچ بھانویں جو کرو پر آل دو آلے نوں تے شور دی آلودگی تے فائرنگ تے شرلیاں پٹاخیاں نال ذلیل نہ کرو ۔ شادی ویاہ دے موقعے تے ہوائی فائرنگ نال کئی وار قیمتی جاناں ضائعا ہوئیاں نیں تے کئی لوکی زخمی یا عمر بھر لئی معذور ہوئے نیں پر اسیں فیر وی اس کم توں باز نہیں آؤندے ۔ جم جم شادی ویاہ کرو ، خشیاں مناؤ پر ایہ نمائشی فائرنگ تے شور شرابا تے نہ کرو ۔ اتوں جدوں دنیا بھکھ نال تے کرونا نال مردی مردی پئی اے تسیں دیگاں چاڑھ کے تے گلی محلے وچ تنبو تان کے بازار بند کر کے ساری ساری رات ڈرامہ لا کے دنیا توں کیہ سنیہا دینا چاہندے او ؟ ایہو ای نہ کہ اسیں اک غیر ذمہ دار ، نمائش پسند تے فضول خرچ قوم ہاں ！ نہ کرو خدا دا ناں جے انج نہ کرو نمائش تے پیسے لاون اڈاون دی بجائے کسے ضرورت مند ضرورت پوری کرن دا سوچو تے شرلیاں پٹاخیاں تے فائرنگ دے بارود تے دھوں وچ پیسے ساڑن دی بجائے کسے چنگے کم وچ حصہ پا کے الله تے الله دی مخلوق نوں راضی کر لو ۔ رب کرے اسیں قومی پدھر تے اس شعور نوں عام کرن تے اس تے عمل کرن دے قابل ہو جائیے ۔ انج کریے تے شیت کوئی وی ہیر ڈولی چڑھدیاں چیکاں نہ مارے تے کھیڑیاں دے بجائے اپنے رانجھن گھر جاندیاں ہوئیاں زور دھگانے اسلحے دی نمائش نال جاون دی بجائے عزت تے احترام نال خش خش جاون جوگی ہو جاوے ۔
