نت دی پُلس گردی دے دل دہلا دین والے واقعات کیہ گھٹ سن؟ پئی اسلام آباد دی مصروف شاہراہ کشمیر ہائی وے تے موٹر دی انھے واہ ٹکر نال چار جیاں دے جانوں جان دی روح فنا کر دین والی خبر نے دل لہو نال بھر دتا.اوس ویلے تاں دل پھٹ ا ی گیا جدوں پتا لگا پئی قاتل گرفتاری توں پہلاں صرف پنجاہ ہزار دے مچلکے دے عوض عبوری ضمانت کران وچ کامیاب ہو گیا. ایس توں وی وڈا دھرو ایہ پئی عبوری ضمانت لئی ملزم دا آپ عدالت وچ پیش ہونا ہوند اہے پر ایتھے ملزم دے پیش ہوئیاں بنا ہی وکیل نے ضمانت کرا لئی.کیہ مجید خان اچکزئی داکیس قانون تے انصاف دے اداریاں دا مونہ چڑان لئی کافی نہیں ہائی؟جیہنے ڈیوٹی تے کھڑے کانسٹیبل نوں دن دیہاڑے گڈی دی ٹکر مار کے مار چھڈیا ہائی؟ پُلس نے ایف آئی آر نا معلوم افراد دے خلاف کٹی حالاں کہ اوس ویلے ہی پتا لگ گیا ہائی پئی گڈی کون چلا رہیا ہائی؟ عدالت سبھ کجھ جاندیاں اچکزئی دی ضمانت وی لئی تے اخیر اوہنوں ’باعزت‘ بری وی کر دتا. وجھا ایہ ہائی پئی پلس کیس وچ کمیاں کوتاہیاں چھڈیاں ہن. کوئی اوہداوال وی ونگا نہیں کر سکیا. کیہ ایس لئی پئی قاتل دا تعلق اشرافیا نال ہائی تے پُلس والا اک کمی کمین ہائی؟.آخر ایہ سبھ کیہ ہے؟کہن نوں پولیس ساڈی محافظ ہے پر ایہ کیسے محافظ ہین جو کدی آپ قاتل تے کدی قاتلاں د ے بانہ بیلی بن جاندے ہین؟پُلس دی پیشا ورانا اخلاقیات کتھے گئی؟ کیہنے پلس تے اشرافیا دے وگڑے بالاں نوں دہشت گردی دا لائسنس دے رکھیا ہے؟ایہ ا وہ سوال ہین جو اج ہر کسے دی زبان تے ہین پر کوئی ہے جو ایہناں سوالاں دے جواب دے کے عوام نوں مطمئن کر سکدا ہے؟تازا واقعے وچ پلس نے روایتی چشم پوشی دا مظاہرا کیتا.جیویں چارجیاں دا قتل کوئی گل ہی نہیں. کیوں جے قاتل دا تعلق اشرافیا نال ہے. تاں ہی تے قانون اوہناں آگے ہتھ بنھی کھڑا وکھالی دے رہیا ہے.قاتل دی ماں دے اتھرو تے’مین سٹیم میڈیا‘ توں لے کے سوشل میڈیا تک سبھ نوں وکھالی دے گئے پرکیہ اوہ چاروں مرن والے ماں مِٹہر سن یاں اوہناں دیاں ماؤں نہیں سن؟ کیوں اوہناں ماواں دیاں اجڑیاں کُکھاں کسے نوں نظر نہیں آئیاں؟ قاتل دی ماں دا ہرکھ اپنی تھاں. رب ساریاں دیاں ماواں نوں بالاں دے کسے وی قسم دے دکھاں توں محفوظ رکھے، پر ایہدا ایہ وی مطلب نہیں پئی کسے نوں وی انسانی جاناں نال کھیڈن دی کھل دتی جاوے. مبینہ طور تے، خبر ایہ وی سنن وچ آئی ہے پئی قاتل بال نے ’پیتی‘ ہوئی ہائی،.پُلس دا کمال ویکھو پئی چند سو گز دور تھانا ہون دے باوجود موقعے تے اپڑن وچ گھنٹے لائے. ایس نالائقی تے ہی پُلس توں پچھنا چاہیدا ہے، پر پچھے کون؟پنجاں دوستاں چوں جیندیاں بچ رہن والے پھٹڑ ’مجیب‘ دسیا پئی جیس گڈی دے ٹکر وجی اوہ کشمالہ طارق داپتر ازلان چلارہیاں ہائی.پرپُلس دی پیشاورانا مہارت دا کمال ہے پئی پچھے اؤندی گڈی دے ڈرائیور نوں قتل دا ذما وار قرار دے کے اوہدی گرفتاری تے واہ واہ کھٹ رہی ہے. کیوں جے قاتل دا تعلق اشرافیا نال ہے.اوہو اشرافیا جہڑی ملک لُٹ کے کھا گئی تے وڈی ڈھٹائی نال ایہ وی آکھ رہی ہے پئی ’اک پائی دی کرپشن نہیں کیتی‘، ویسے اشرافیا آکھدی ٹھیک ہے کیوں جے کرپشن پائی دی نہیں ارباں کھرباں دی ہے. گڈی لال بتی دا اشارا وی توڑیا. گڈی اوور سپیڈ وی ہائی.پُلس دی دُہائی اپنی تھاں کہ آئے دن پُلس والے خاص کر ٹریفک پُلس والے ایسے اشرافیا توں کُٹ کھاندے ویکھنے ہاں. جتھے اشرافیا کسے قانون دی پابند ہی نہ ہووے اوتھے اجہے واقعیاں تے حیرت کاہدی؟ قانون تے فیر نکی شئے ہے ایتھے اشرافیا نوں آئین توڑن دی کھل ہے. کوئی پچھن والا نہیں. ایہ وی پتا لگا پئی اوس بال دیاں حرکتاں پہلے وی ٹھیک نہیں سن.ایہووگڑیا بال ایچئسن کالج چوں اپنیاں حرکتاں پاروں کڈھیا گیا. ایتھوں ہی اندازا لایا جاسکدا ہے کہ وڈے گھراں دے منڈے کُڑیاں وگڑدے کیویں نیں؟جہناں گھراں وچ بے غیرتی حدوں ودھ جاوے، ماپیاں کول اپنیاں عیاشیاں پاروں اولاد دی سانبھ سنبھال لئی ویہل ای نہ ہووے تے بال انج ہی وگڑدے ہین.دوجا جہناں دے مونہ وچ رزق ِ حلال دا نوالا نہ گیا ہووے اوہناں توں ہور کیہ اُمید ہو سکدی ہے؟ ’ریمنڈڈیوس‘دی رہائی تے اسمان سر تے چکن والے اج چپ کیوں ہین؟بے حسی دی انتہا ہے پئی قانون طاقتور موہرے بھیگی بلی تے غریب لئی آفت ہے. عدالتاں چین دی نیند سو ں رہیاں ہین پئی مرن والیاں دا تعلق نہ کسے وڈے خاندان نال ہے نہ ای اوہ کوئی رئیس زادے سن.ا وہ تے کیڑے مکوڑے سن. جہناں دے بھاگیں پیراں ہیٹھ کچلے جانا ہی ہے. جے گڈی دی ٹکرنال مر گئے تاں کیہ؟ ابتدائی رپورٹ توں مبینہ طورتے،صاف لگداہے پئی ایہ قتل عمد ہے. پر شاباش ساڈی پیشا ور پلس دے جہڑی کشمالہ دے قاتل پتر نوں سزا توں بچان لئی اوتاولی ہوئی ہے. ایہ وی سنن وچ آ رہیا ہے پئی جہناں پلس والیاں موقع دا نقشا تے گڈی دے اشارا توڑن دی گل کیتی اوہناں نوں الٹا معطل کر دتا گیا ہے، نال ایہ وی پئی ساری اشرافیا کشمالہ دے پتر نوں بچان لئی لانگڑ کس کے میدان وچ آ گئی ہے. نویاں نویاں تاویلا گھڑیاں جا رہیاں ہین. اج واقعے نوں کئی دن لنگھ گئے ہین پر اجے تک پلس دی تفتیش دا رُخ ای سدھا نہیں ہو سکیا. سگوں تفتیش نوں غلط رُخ دین لئی سر توڑ کوششاں ہو رہیاں ہین.ہن مرن والیاں دے وارثاں نوں دھونس دھاندلی نال، ڈرا دھمکا کے، کجھ دے دوا کے کیس دی پیروی توں روکیا جائے گا.سنیا ہے ایہ پیش کش ہو وی گئی ہے. کہن ایہ خبر اؤنا باقی ہے پئی وارثاں نے صلح ہو ن تے کیس دی پیروی نہ کرن دا فیصلا کیتا ہے.اسیں تے سن دے ساں ’لمے ہتھ قانون دے‘پر ایہ کیہ اشرافیا دے ہتھ تاں اوس توں وی لمے ہین..؟
