پنجابی زبان وچ ہر سال وکھ وکھ صنفاں وچ لکھیاں کتاباں چھپپدیاں رہندیاں نیں ۔زیادہ تر لکھاری اپنے کولوں پیسے خرچ کر کے کتاب شائع کراندے تے فیر اپنے یاراں دوستاں وچ ونڈدے ویکھے نیں ۔یار دوستاں نوں صرف کتاب اُتے اپنا ناں تے القابات ویکھن دا شوق ہوندا اے۔کتاب کیسی اے؟موضوع نال کتھوں تیک انصاف ہویا اے؟ اوہنوں ایس گل نال کوئی غرض نہیں۔ ایہ لکھاری دی سِر دردی اے جو اوہ پہلے رقم خرچ کر کے کتاب شائع کراۓ تے فیر گھر گھر جا کے کتاب ونڈدا نظر آوے۔میرے خیال وچ کتاب دیون یا رکھن دی بہترین تھاں لائبریری ہوندی اے۔انھے واہ کتاب ورتاون دا کوئی فائدہ نہیں۔جو سمجھدا اے جے کتاب اوس دے کم دی اے اوہ کوشش کر کے قیمتاً کتاب لے کے اپنی ذاتی لائبریری دی زینت بناوے۔ میرا جد دا پنجابی زبان وادب نال تعلق بنیا اے،میں اپنے موضوع یا شوق پاروں کتاباں خریدا رہندا ہاں
سگوں ریٹائرمنٹ دے بعد وی کتاب نالوں ناطہ نہیں توڑیا۔ ۔ ایہ وی ٹھیک اے جے کجھ کتاباں اعزازی وی مل جاندیاں نیں،ہر فیر وی چنگی کتاب حاصل کرن وچ کدے دیر نہیں کیتی۔ گورنمنٹ کالج یونیورسٹی فیصل آباد وچ اک صاحب کوئی اک دو نویاں کتاباں اپنے ہتھ وچ یا دفتر وچ میز تے سامنے کتاب رکھ کے بیٹھے رہندے۔۔اوہناں دا خیال ہوندا سی جے ریاض شاہد مینوں ایس کتاب یا کتاباں بارے پُچھے گا۔ہور کسے نوں تے اینا شوق ای نہیں سی ہوندا۔میں اوہناں دی نفسیات جان دا ساں سو میں کسے ہور موضوع تے گل بات کر لیندا سی پر کتاب بارے کدے وی نہیں جے ایہ تہاڈے کول کیہڑے ذریعے نال پہنچی اے۔ میں دورں ہتھ وچ یا میز تے پئی کتاب بارے کدے گل بات نہیں سی کیتی۔اوہ ایس پاروں جے جیہڑی نایاب کتاب سمجھ کے اوہ کالج تے فیر یونیورسٹی دور وچ آندے رہے اوہ کتاب پہلے توں ای میرے ریکارڈ وچ موجود ہوندی یا میں ناں پڑھ کے کجھ دناں بعد ضروری سمجھدا تے حاصل کر لیندا رہیا۔ میرے ولوں وی ہر ادب درست نوں کتاب پیش کرن دا حوصلہ موجود رہیا اے۔سگوں میں کئی واری لکھاری حضرات کولوں پیسے دے کے پنج یا فیر دس کتاباں حاصل کردا رہیاں۔جنھاں دناں وچ میں سید بلھے شاہ دی حیاتی تے فِکر فن بارے کم شروع کیتا، تاں جو کتاب قیمتاً مل جاندی اوہ میں خرید لیندا ۔ جیہڑی مُل نہ ملدی میں اوس دی فوٹو کاپی کرا لیندا۔ میرے مقالے دی ببلیو گرافی ساڈے پنج سو دے قریب اے۔سگوں ایس توں ہٹ کے وی کجھ کتاباں ویکھنیاں پیندیاں۔جیویں ہتھ ملاون والا ہر بندہ دوست نہیں ہوندا ،ایسے طراں ہر کتاب پڑھن جوگ ہوندی اے حوالہ جوگ نہیں ہوندی۔ گل کرن دا مقصد ایہ وے جے میں لائبریریاں دے چکر کٹن دی بجاۓ لائبریری ای خرید لئی۔یعنی اودوں ای میں اپنی لائبریری بنانا شروع کر دتی۔تے انج اپنا سارا مقالہ اپنے گھر بیٹھ کے لکھیا۔ انج اللہ تعالی دے کرم نال سال 2000 وچ میری پی ایچ۔ڈی مکمل ہو کے ڈگری وی مل گئی۔ اگر باقی سجن وی میرے وانگ اپنی اپنی لائبریری دی اُساری کرن تاں کنیاں کتاباں مُل لے کے کتاباں دی آہمیت بنائی جا سکدی اے۔ایس ویلے پنجابی دے پروفیسر یا سکالر حضرات غور کرن تاں کتاباں دی قدر ودھ سکدی اے۔ میرے نزدیک کتاباں کسے سکالر دا گہنا ہوندیاں نیں۔جیویں گہنا سانبھ کے رکھیا جاندا اے، اوسے طراں کتاباں دی حفاظت تے ایہناں وچ ہر سال وادھا کرن نال ای لوکاں وچ اپنی ماں بولی زبان دی آہمیت بنائی جا سکدی اے۔ پنجابی نال محبت کرن والے دوست پنجابی رسالے تے اخبار اپنے نام جاری کرا کے نویاں چھپ رہیاں یا چھپیاں کتاباں بارے معلومات حاصل کر سکدے نیں۔لکھاریاں دی حوصلہ ودھائی واسطے اوہناں کولوں قیمتاً کتاباں لینیاں چاہیدیاں نیں۔
