اج کل بال ادب دے حوالے نال بھرواں کم ہو رہیا اے۔سال 2020 وچ گوجرانوالہ دے لکھاری امجد شریف دا بال ادب شعری پراگہ سامنے آیا اے۔بال ادب دے سلسلے وچ گوجرانوالہ دا پہلا نمبر آکھ لیا جاوے تاں کوئی حرج نہیں۔ڈاکٹر فقیر محمد، امین خیال، غلام مصطفے بسمل، شیراز محسن ،محمد جنید اکرم، سلطان کھاروی،محمد اقبال نجمی ، محمد احمد شاد تےڈاکٹر اسحاق جاوید دے بال شعری پراگیاں نے اپنے اپنے دور وچ دُھماں پائیاں۔ سال 2020 وچ اردو تے پنجابی زبان دے سیوک تے شاعر امجد شریف ہوراں اپنے شہر دی روایت نوں زندہ رکھدیاں ہویاں بال ادب وچ اپنا شعری پراگہ دھرتی چن تے پُھل لے کے آۓ۔48 صفحیاں دی ایس کتاب وچ حمد تے نعت ملا کے 35 نظماں شامل کیتیاں نیں۔امجد شریف اردو زبان وچ وی بالاں بارے لکھدے نیں تے پنجابی وچ لکھیا ادب ہر پاسے توں مانا پَتر حاصل کر رہیا اے۔لمے عرصے توں شعر دے فن وچ مشہور ہوون دے باوجود شاعر بال ادب نوں ہتھ نہیں پاندے۔ایس حوالے نال امجد شریف بازی لے گیا اے جے ایہنے مادری زبان بولن والے بالاں دے مزاج تے عمر نوں ساویں رکھدے ہویاں خوب صورت نظماں لکھیاں نیں۔
امجد شریف ہوراں کوشش کیتی اے جے نظماں وچ قومی تے ملی موضوعات نوں بالاں تیک پہنچایا جاۓ۔ایس سلسلے وچ اوہناں پہلے اللہ تعالی دی صفت ثنا تے فیر پاک نبی حضرت محمد ﷺ دی نعت دے بعد، قائد اعظم محمد علی جناح ،ڈاکٹر علامہ اقبال، شالا جیوے پاکستان ، شالا رہن سلامت سارے تے ساڈا ہالی نظماں وچ اسلامی تے پاکستانی سوچ تے نظریئے دی بھرپور عکاسی کیتی اے۔ شاعر نے نِکے نِکے مصرعیاں وچ اکھراں دے جیہڑے موتی پروۓ نیں ان شا اللہ ایہناں دی چمک دمک تا دیر قائم رہوے گی۔ایہناں اپنی ایس کتاب وچ لفظ بڑے سادہ تے زبان تے چڑھ جاون والے ورتے نیں۔ایہناں دیاں باقی نظماں لوواں دیندے منظر ،میں وی ایہو کہنا واں ، ماں ،ویلے دے جو ٹُریا سنگ تے دُھپ دے مگروں چھاں ورگیاں نظماں وچ اصلاحی تے تعمیری جزبہ کارفرما اے۔ امجد شریف بالاں تیک اپنا سنیہا پہنچاون وچ بڑے کامیاب نظر آ رہے نیں۔نظم سُفنہ وچوں کجھ شعر ویکھو۔ روز دیہاڑے سُفنہ ویکھاں ہر موڈھے تے بستہ ویکھاں ۞ ہر اِک بال سکولے جاوے ہسسے کھیڈے لُڈیاں پاوے ۞ جیہنوں ویکھاں پڑھدا ویکھاں علم دی پوڑی چڑھدا ویکھاں ۞ ایسے طراں نظم رُکھ وچ نویں بوٹے لاون دا پیغام دتا گیا اے۔جیویں جیہڑا ایتھے لاوے رُکھ شالا ہر دم پاوے سُکھ ۞ رُکھ نیں ساڈے گوہڑے یار ساڈے نال نیں کردے پیار گل کیہ پئی امجد شریف ہوراں صحافتی تے ادبی ذمہ داریاں نبھاؤندیاں ہویاں بالاں بارے ڈھرتی چن تے پُھل ورگی کتاب لکھ کے بال ادب وچ سُچا تے نرول وادھا کیتا اے۔ امجد شریف دی بال شاعری بارے ڈاکٹر حفیظ احمد
ہوراں اپنیاں نیک خواہشاں دان کیتیاں نیں تے مجموئی طور تے کتاب نوں بال ادب وچ اک سلکھنا وادھا قرار دتا اے۔ ۔۔
