حضرت سلطان باہو ؒ دے خاندان دے نوجوان دانشور سلطان احمد علی، علمی ادبی دینی تے اسلامی حوالے نال اپنی اِک وکھری پہچان بنا چُکے نیں۔عالمِ شباب دی عمر وچ اوہناں اپنے آپ نوں اِک صوفی تے دانشور دے روپ وچ متعارف کرایا اے۔اوہ اِک جہاں دیدہ شخصیت نیں ۔ عالم اسلام دے مسلیاں تے معاملیاں اُتے اوہناں دی ڈونگھی نظر اے۔حضرت سلطان باہو تے ڈاکٹر علامہ اقبال دی فِکر تے پیغام نوں اوہناں مسلم قوم دے احیا تے اسلام تشخص نوں اُجاگر کرن واسطے چُن لیا اے۔ایہو وجہ اے جے سلطان احمد علی دیاں لِکھتاں تے تقریراں وچ ایہناں بزرگاں دی روح بولدی اے ۔ سلطان احمد علی اردو، عربی، فارسی، انگریزی تے پنجابی زبان وچ کُھل کُھلا کے گل بات کر سکدے نیں ۔ اوہ اپنیاں دلیلاں نال حقی تے سچی بات نوں مناون تے تسلیم کراون دا فن چنگی طراں جان دے نیں۔ اوہناں دی دنیا دی تاریخ تے مزاہب تے وی گہری نگاہ اے۔ایہو وجہ اے جے دنیا جہان دا کوئی وی موضوع ہووے ،سلطان احمد علی اوس دی ونڈ کر کے سارے پکھ ساڈے ساویں کھول دیون گے۔ اپنے آسے پاسے نظر دوڑا کے ویکھیۓ تاں سانوں ایہناں ورگا نوجوان مفکر کدھرے وکھائی نہیں دیندا۔ پاکستان وچ دین اسلام دے بارے جد وی کوئی مسلہ پیش آوے، تاں سلطان احمد علی اوسے وقت اوس مسلے دے بارے وڈیو ہیغام راہیں لوکائی دی رہنمائی کر دیندے نیں۔ساڈے پاکستانیاں واسطے فخر دی گل اے جے سانوں اکثر محفلاں وچ سلطان احمد علی دے فِکراں تے علمی موضوعات توں فیض حاصل کرن دے موقعے حاصل ہوندے رہندے نیں۔ اللہ تعالی ایہناں تے اپنا اُچیچا کرم فرماۓ ،تاں جے اسیں ایہناں دیاں دین اسلام دی برتری بارے بیان کیتیاں گلاں باتاں توں فائدہ چُکدے رہیۓ۔
ایس واری 2021 دے رمضان شریف وچ سلطان احمد علی ہوراں ہر روز قرآن مجید دے اِک مکمل پارے دی تشریح دا بیڑا اُٹھایا اے۔ آپ ہر پارے وچ موجود موضوعات دا تفصیلی احاطہ کردے نیں۔ایہ سلسلہ پہلی رمضان توں شروع ہو کے 30 رمضان تیک جاری رہوے گا۔اپنے بیان وچ سلطان احمد علی صاحب پس منظر تے پیش منظر نوں سامنے رکھ کے قرآن مجید وچ اک سار موجود موضوعات دی بھرویں ونڈ کردے نیں۔ ایس بیان وچ اوہ قرآن مجید دی فضیلت ،حضور اکرم حضرت محمد دی سیرت ، کردار تے حدیث پاک دے حوالے نال آیتاں بارے نتارویں بحث کردے وکھائی دیندے نیں۔ قرآنی مفہوم دی وضاحت کرن واسطے بعض اوقات اوہ نرم لہجے نالگل بات سمجھاندے نیں تے بعض اوقات زوردار انداز وچ گل نوں سمجھاون دا آہر کردے نیں۔بڑی پُر مغز گفتگو ہوندی اے جیس نوں سُنن والے گہرا اثر قبول دے نیں۔ سلطان احمد علی دیاں ایہ ساریاں تقریراں اشاعت دے قابل نیں ۔کیوں جے بندہ تھوڑے وقت وچ قرآن مجید دی روح نوں سمجھن دے قابل ہو سکدا اے۔ایہ 30 تقریراں اپنے انداز بیان پاروں وی ڈاڈھا متاثر کردیاں نیں۔ایس پاروں ایہناں دی اشاعت اِک آہم دینی کم سمجھیا جاوے گا۔ ماشااللہ
