۞ پنجابی لکھاری اپنے کار ویہار وچوں کجھ وقت پنجابی زبان دی ترقی تے ودھا واسطے وی کڈھ لیندے نیں۔ کجھ لکھاری کار ویہار دیاں ذمہ داریاں وی نبھاندے پئے نیں تے پنجابی زبان بارے وی مثبت سوچ رکھدے نیں۔ جیویں ڈاکٹر شہباز ملک اج کل اپنے گھر وچ بیٹھے پنجابی کتابیات دی تیجی جلد دی تیاری وچ مگن نیں۔ڈاکٹر شہباز ملک ہوری پہلیاں 2 جلداں وچ پنجابی زبان بارے شاہ مکھی رسم الخط وچ چھپیاں 25 ہزار کتاباں بارے مکمل جانکاری دے چُکے نیں۔ایہناں چھپیاں دونویں جلداں وچ پنجابی زبان بارے اردو وچ شائع شدہ کتاباں بارے وی معلومات موجود نیں۔ ایہ کتاب پنجابی زبان دے ریسرچ سکالراں واسطے اِک نعمت توں گھٹ نہیں۔ایہناں جلداں وچ پنجابی زبان بارے لکھے گیۓ ایم اے ،ایم فل تے پی ایچ_ ڈی دے مقالات بارے وی معلومات دتیاں گئیاں نیں۔ایس دے نال نال ادبی رسالیاں دے خصوصی نمبراں بارے وی جانکاری موجود اے۔پنجابی لکھاری اپنیاں تازہ چھپیاں کتاباں بارے ڈاکٹر شہباز ملک ہوراں نال رابطہ جانکاری کرا سکدے نیں۔ پنجابی زبان وچ تحقیق تے تنقید دے حوالے نال پروفیسر حمیداللہ شاہ ہاشمی ہوراں دا ناں وی بڑا معتبر اے ۔ایہناں دیاں ادبی خدمتاں دے اعتراف دے طور تے ایہناں نوں 23 ماچ 2021 نوں صدر پاکستان ولوں تمغہ امتیاز ملیا اے۔ایہناں دیاں 100 توں ودھ اردو تے پنجابی وچ لکھیاں تصنیفاں موجود نیں۔ہروفیسر حمیداللہ شاہ ھاشمی اج کل اسلام آباد وچ مقیم نیں۔ ایسے طراں عبدالحکیم ضلع خانیوال وچ مقیم معروف ادبی شخصیت صاحب زادہ یوسف طاہر موجود نیں۔ایہناں کجھ ورھے کلیات صفوری ناں دی کتاب شائع کیتی اے۔ اج کل ایہ حاجی محمد صفوری دی سسی نوں نویں سرے توں ایڈٹ کر رہے نیں۔ بزرگ نیں ،کئی اِک مرضاں دا شکار نیں پر ایہناں قلم نال اپنا رشتہ قائم دائم رکھیا۔ایہناں دی کمال ہمت اے جے حالے تیک ادبی کماں کاراں وچ مصروف نظر آندے نیں۔
جھنگ شہر وچ وسدے پنجابی کہانی کار حنیف باوا ہمت تے ادب نال لازوال جُڑت دی مثال ساڈے سامنے موجود اے۔ایہناں پنجابی کہانی دے نال نال پنجابی نظم وی لکھی اے۔ دنیا دیاں کجھ دوجیاں زباناں دے ادب دے پنجابی زبان وچ ترجمے وی کیتے نیں۔انشائیہ وی لکھیا اے۔ایہناں ورگے لکھاری پنجابی زبان دا آثاثہ نیں۔ ایسے طراں مقام کسو آنہ جھنگ دے لکھاری منظور زبیری نیں۔1944 وچ پیدا ہوون والے ایہ لکھاری 1960 _1970 دے دھاکے وچ پنجابی رسالے لہراں تے پنجابی ادب وچ ڈھیر چھپدے رہے۔غلام مصطفی بسمل ہوراں اپنی کتاب میلے مِتراں وچ ایہناں دا بھرواں تعارف تے ادبی مسودیاں بارے جانکاری کرائی تے ایہناں نوں نظم راہیں خراج تحسین وی پیش کیتا۔ویلے دے ادلا بدلی پاروں ایہناں دا بہت سارا کلام ضائع ہو چکیا اے۔ اج کل ایہ منظور سیالوی دے ناں تے لکھدے نیں۔اپنے پنڈ کسو آنہ وچ ماضی نوں یاد کردے نیں۔ایہناں نال کجھ عرصہ پہلے ای میری شناسائی ہوئی اے۔لہراں سال 1966 دے اک شمارے وچ ایہناں دی چھپی غزل نے مینوں مجبور کر دتا جے میں ایہناں دی بھال وچ لگ گیا۔آخر اک سال دی محنت تے توجہ پاروں منظور زبیری نال رابطہ ہو گیا۔ہن ایہناں نال موبائل تے گل بات ہوندی رہندی اے۔ ایہ تے کجھ شخصیات سن۔کئی ہور ادبی ہیرے وی موجود نیں جنھاں بارے جاننا بہت ضروری اے۔
