پنجابی زبان دیاں رنگاں نوں شنگارن والے اک معتبر شاعر اسیر سوہلوی ہوۓ نیں۔ایہناں دادور 1914_1998 بن دا اے۔ایس مان تران ہستی دا جنم 1914 نوں تحصیل تے ضلع گورداس پور دے اک پنڈ سوہل وچ ہویا۔والد دا ناں فضل دین سی۔فضل دین اک عالم فاضل شخص سن۔اک مزہبی عالم دے طور تے اوہناں دا عام لوکائی وچ بڑا احترام سی۔ اسیر سوہلوی ہوراں اپنے پنڈ توں نیڑے دھاریوال دے سرکاری سکول وچوں چار جماعتاں پڑھیاں۔اسیر سوہلوی نکی عمرے ای اپنے ماماجی نوردین کول راولپنڈی آ گیۓ۔ایتھے کجھ عرصہ قیام کیتا تے فیر اپنے سیلانی مزاج پاروں ایہناں نوں وکھ وکھ تھاواں تے رہن دا موقع ملیا۔ بمبئی تے لاہور وی جان دا اتفاق ہویا۔ پینٹری دا کم سکھیا۔ نال نال شاعراں ادیباں نال رابطے ودھاۓ۔پاکستان دے قیام توں پہلے ای ایہناں شاعری دے میدان وچ اپنا ناں کما لیا ہویا سی۔ایہو وجہ اے پیئی جد 1947 وچ تحریک آزادی زوراں تے سی ،ایہناں پاکستان دے مطالبے دے حق وچ بھرپور نظماں لکھیاں۔ڈاکٹر شہباز ملک ہوراں دا آکھنا اے جے لعل دین توں ایہناں اپنا ناں اسیر سوہلوی ایسے پاروں اختیار کر لیا جے اسیر دا وطن آزاد نہیں۔بعد وچ ایہو ناں ایہناں دی پہچان گیا۔ایس تخلص رکھن بارے ایہناں اک بند وچ ایسراں اظہار کیتا اے۔ ماتم نہ کرے دل کیویں برباد وطن دا روح دُکھدا اے جد حال کراں یاد وطن دا رکھدا نہ اسیر اپنا تخلص میں کدی وی وسنیک جے ہوندا کدی آزاد وطن دا
اسیر سوہلوی ہوراں شاعری دیاں بہت ساریاں صنفاں وچ اپنیاں فِکری سوچاں دا تانا بانا بُنیا۔اوہناں حمد ،نعت ، منقبت ، سلام ،مرثیہ ،نظم ،غزل ،مثنوی ، رباعی تے کجھ لوک داستاناں نوں قلم بند کیتا۔اسیر سوہلوی ہوراں اپنے منفرد اندازِ بیان پاروں لازوال لکھتاں نوں لوکائی دے ساویں پیش رکھیا۔سرکارے دربارے تے پنجابی دے ادبی حلقیاں وچ ایہناں دا سِکہ چلدا,سی۔اسیر سوہلوی ہوراں اپنے دور دے پنجابی دے سر کڈھ لکھاریاں نال ڈونگھے رابطے سن۔ایہناں دے شاگرد خاص طور تے یسین الفت تے صدیق تاثیر ،اپنے استاد نال بڑی چاہت رکھدے نیں۔ اسیر سوہلوی دے ادبی کماں دا بڑا کھلارا اے۔ایس کھلارویں کم دی وجہ اوہناں دا لوکاں نال پیار بھرپن اے۔سال نومبر 1999 وچ مینوں اسیر سوہلوی بارے کم کرن دا شوق پیدا ہویا۔اصل وچ میرا خیال سی محمد یوسف ملک نوں ایم فل پنجابی واسطے تیار کرنا چاہندا ساں۔میں اوہناں نوں تحقیق دے پاسے ڸایا تے فیصل آباد دے مرحوم لکھاریاں بارے کم دا آغاز کر دتا۔لال دین اسیر سوہلوی ۔۔۔۔حیاتی تے شاعری اوسے تعلق دے نتیجے پاروں لکھیا گیا۔
اسیر سوہلوی دے اک لاڈلے تے اعلی پاۓ دے شاعر یسین الفت ہوراں اپنے استاد محترم دا کلام شائع کرن دا پروگرام ترتیب دتا اے۔ اوہناں میرے نال ایس موضوع تے گل بات کیتی تاں میں اوہناں نوں محمد یوسف ملک دا لکھیا اسیر سوہلوی بارے چھپیا مضمون ماہنامہ لہراں شمارہ جنوری 2000 پیش کر دتا۔اسیر سوہلوی دا وصال فیصل آباد وچ ہویا۔شہر دے ادبی حلقیاں ولوں کئی اک تعزیتی اکٹھ وی ہوۓ تے مقامی اخباراں نے خصوصی ایڈیشن شائع کیتے۔پروفیسر ریاض قادری ہوراں ڈیلی یارن دے ادبی صفحےچ شعروسخن دا خصوصی ایڈیشن شائع کیتا۔ایس ایڈیشن وچ شہر بھر دے لکھاریاں اسیر سوہلوی نوں نثر تے شعراں وچ زبردست خراج تحسین پیش کیتا۔
اخیر تے اسیر سوہلوی دا لوک داستان دے کردار سوہنی بارے لکھیا اک بند پیش اے۔شاعر دی فکری تے شاعرانہ عظمت ویکھن واسطے اکو بند ای کافی لگ رہیا اے۔ شاعر نے سوہنی دے رڑھن نال، اپنے اعمالاں دے دریا بُرد ہوون دی گل دی گل وی کر دتی اے۔ اِک ڈُبی سی سوہنی چنہاں اندر ، چھپے اوس دے قصے کہانیاں نیں ڈُبیاں کئی بے دوسیاں سوہنیاں نیں، اُچی ساہ نہیں ڸۓ نمانیاں نیں ساڈے بھیڑے اعمال وی رُڑھ جاندے ،جیویں ہڑ نے ہر شہ روڑھ دتی دوش کسے نوں کیہ اسیر دیئے بیڑی ساڈے اعمالاں نے بوڑھ دتی
