اِک ایہو جیہا دور وی گزر چکیا اے جد ادبی سرگرمیاں دیاں خبراں اخباراں دی زیبت ہوندیاں سن۔ ہر اخبار وچ سیاسی معاشرتی تے قومی موضوعات اتے باقاعدہ کالم چھپدے رہے۔لوک اپنے اپنے ذوق دے مطابق اپنی اپنی پسند دا کالم پڑھ لیندے۔میرا شروع توں ای ادبی کالم پڑھن وچ دل لگا رہندا سی۔1978 تے 1985 دے زمانے وچ میں لاہور شہر دیاں ادبی محفلاں وچ ودھ چڑھ کے حصہ لیندا رہیاں۔اوہناں دناں وچ پنجابی ادبی پروار دے اجلاس بڑی باقاعدگی نال ہوندے رہے۔پروار دے موہری لکھاری ڈاکٹر شہباز ملک، ڈاکٹر بشیر گورایا، ڈاکٹر محمد یونس احقر ،ڈاکٹر انعام الحق جاوید, تے بعد وچ اقتدار واجد تے ڈاکٹر ناصر رانا وی پروار نال شامل ہو گۓ۔ میں پنجابی ادبی پروار دا رابطہ سیکرٹری مقرر ہو گیا۔ پروار دیاں ہفتہ وار میٹنگاں ہوندیاں ۔اجلاساں وچ نظم تے نثری لکھتاں تے بحث ہوندی۔ہر مہینے اک مشاعرہ وی منعقد ہوندا۔پروار دے اجلاس مال روڈ لاہور دے اک ہوٹل وچ ہوندے۔ پروار وچ دوجے شہراں جیویں گوجرانوالہ، شیخوپور، ،سیالکوٹ، پسرور ، فیصل آباد قصور تے مضافات دے لکھاری رونق لگاون آجاندے۔لاہور دے سارے سر کڈھویں لکھاری پنجابی ادبی پروار دے اجلاسںاں وچ بڑے ذوق شوق نال آؤندے۔ ایہناں اجلاساں وچ سلیم کاشر، رؤف شیخ ، منظور وزیرآبادی، اطہر نظامی، صحرائی گورداس پوری ،راجہ رسالو، شفقت تنویر مرزا، عارف عبدالمتین، بیدار سرمدی، یونس علی دلشاد ،عطاالحق قاسمی، اسماعیل عاطف،یعقوب پرواز، اقبال زخمی، طفیل خلش تے ہور ان گنت لکھاری پروار دیاں محفلاں وچ رونق افروز ہوندے
میرا کم ذرا زیادہ ہوندا سی۔میں لکھاریاں نال خود جا کے رابطہ کردا۔اجلاس دی رپورٹ تیار کر کے اخباراں دے دفتر پہچاندا۔سارا پنیڈا پیدل یا سائیکل تے کردا رہیاں۔ جو رپورٹاں پنجابی ادبی پروار بارے چھپدیاں یا کسے کالم دا حصہ ہوندیاں اوہ سارے اخبار تے رسالے ریکارڈ واسطے خرید کے محفوظ کر لیندا رہیا۔ اوہناں دناں وچ روزنامہ مغربی پاکستان وچ معروف لکھاری غلام مصطفی بسمل ہوراں پنجابی صفحہ شروع کر دتا۔میں ایس اخبار وچ وسے شہر لاہور دے سرناویں ہیٹھ ادبی کالم لکھن دا سلسلہ شروع کر دتا۔ایس ساری تفصیل لکھن دا مقصد ایہ وے جے اج دے لکھاریاں نوں دسیا جاوے تے پنجابی وچ پہلے لوک کس سطح دا کم کردے رہے۔مینوں ایس پنجابی نال ڈھیر تعلق دا بڑا فائدہ ہویا جے پنجابی دے سارے سرکڈھویں لکھاریاں نال اک مضبوط تعلق بن گیا جیہڑا چالھی سال بعد وی اللہ تعالی دے فضل کرم نال قائم دائم اے۔
لاہور وچ میرا قیام ستمبر 1975 توں لگ کے ستمبر 1985 تیک رہیا۔میری ملازمت واپڈا وچ سی تے دفتر واپڈا ہاؤس۔بہت اعلی مقام ۔نیشنل سینٹر الفلاح بلڈنگ ، ریڈیو پاکستان ۔ ہنجاب یونیورسٹی ، انار کلی بازار ، فیروز سنز ، ادارہ کلاسک تے رسالہ مہینہ وار لہراں دے مدیر ڈاکٹر سید اختر حسین اختر ہوراں دا سیکرڈ ہار ڈ سکول ۔ایہ سارے ادارے میں پیدل ای ویکھ آؤندا۔ پنجابی ادب ول میرا جھکاؤ پروفیسر حفیظ تائب ہوراں دی ملاقات دے بعد ہویا۔میں شروع وچ اردو بولن وچ اگیرے ہوندا سی۔اردو وچ ایم اے ایسے پاروں پہلے ہو گیاسی۔پروفیسر حفیظ تائب تے میرے والد صاحب چوہدری سراج دین واپڈا وچ اکٹھے کم کردے سن ۔اوہناں مینوں ایم اے پنجابی کرن دا مشورہ دتا ،جیہڑا مستقبل قریب وچ میرے روزگار دا وسیلہ بن گیا۔ پر فیر تے ہر پاسے پنجابی پنجابی ہو گئ۔اج بہت سارے لوک پنجابی شعبے وچ آ تے گئے نیں پر اوہناں دا مزاج پنجابی نہیں۔شُکر اے جے 30 سال ملازمت کرن دے باوجود میں پنجابی زبان نالوں اپنا رشتہ توڑیا نہیں۔میرا اج وی اپنے اساتذہ نال ڈونگھا رشتہ اے۔ڈاکٹر شہباز ملک ڈاکٹر، محمد یونس احقر، ڈاکٹر محمد بشیر گورایا تے ڈاکٹر انعام الحق جاوید میرے واسطے انتہائی قابل قدر شخصیتاں نیں۔اللہ کرے جے ایہ چراغ اپنیاں کرناں ایسے طراں ونڈدے رہن۔
