شاہد ناز اوکاڑوی دے ۞ ون سَونے پُھل ۞ | Dr Muhammad Riaz Shahid

 ناز اوکاڑوی دا ناں پنجابی زبان دے اوہناں سیوکاں وچ لیا جاندا اے، جیہڑے بڑی لگن ،دلچسبی تے شوق نال پنجابی زبان نوں وکھ وکھ حوالیاں نال شنگارن دا کم کردے رہندے نیں۔ ایہناں دا مسکن اوکاڑہ اے ،ایسے پاروں اوہ اپنے ناں دے نال اوکاڑہ لکھدے نیں ،حالانکہ جد ایہ اوکاڑے جاندے نیں تاں اوتھوں دے یار بیلی تے ادبی دوست ایہناں نوں ناز لاہور والے کہہ کے بلاندے نیں۔ ناز اوکاڑوی ہوری اردو تے پنجابی دوہاں زباناں وچ لکھدے نیں پر پنجابی وچ ایہناں دا شوق زیادہ اے۔ایہ اکو وقت وچ شاعر وی نیں، کہانی کار وی نیں ، مضمون نگار وی نیں تے نقاد وی ۔ایس توں وکھ ایہناں دا صحافتی حوالہ بڑا پکا پیڈھا اے جے ایہ اپنے سجن پروفیسر عاشق رحیل نال مِل کے کتاب لڑی سنیہا ویط شائع کر رہے نیں۔2017 توں شروع ہوون والہ ایہ رسالہ پنجابی زبان تے ادب دے حلقے وچ اپنی وکھ پہچان بنا رہیا اے۔ ناز اوکاڑوی ہوراں دا مزاج نرم دل ،رواداری دے جزبیںاں نال بھرپور تے دوسرے فرد دے کم کر کے تے کم آ کے خوشی محسوس کردے نیں ۔بڑے بًردبار، صابر تے اللہ تعالی دی رضا تے شاکر نیں۔ نوجوانی وچ ای کار ویہار دے سلسلے وچ عرب ریاستاں وچ گزاریا۔حاجی نمازی تے پرہیزگار شخصیت نیں۔نظریہ پاکستان نال دلوں بجانوں جُڑے ہوۓ نیں۔اپنی ادبیت دی پہچان تے کامیابی دی سند کسے ہور دیس ولوں نہیں لیندے۔سگوں اپنی سوہنی دھرتی پاکستان ای ایہناں دی شناخت اے۔اج کل ایہ لاہور شہر دے واسی نیں ،پر اوکاڑے ہر مہینے زیارت کرا کے آؤندے نیں۔ ایہناں دیاں کتاباں ڈوہنگے پانی بیت بازی سوچ رہیاواں ادبی دنیا وچ اپنی مانتا تسلیم کر چُکے نیں۔بیتے ورھے ایہناں دا اک ہور ادبی معرکہ ون سَونے پُھلاں دی شکل وچ سامنے آیا اے۔144 صفحیاں دے ایس شعری پراگے وچ حمد نعت غزلاں نظماں تے گیت شامل نیں۔ایہناں دی ایس بارے پروفیسر عاشق رحیل تے پروفیسر واصف لطیف ہوراں اپنے ناقدانہ وچار پیش کیتے نیں۔پروفیسر عاشق رحیل ہوراں سولھ ملوک شاعری دے سرناویں ہیٹھ اپنے وچار سانجھے کیتے نیں۔ایہناں لکھیا اے جے ناز اوکاڑوی ہوراں اپنیاں غزلاں وچ زندگی دے ہر مسلے تے کُھل ڈُھل کے چانن پایا اے پر اوہناں غزل دی قدیم تعریف نوں وی نظراں توں اوہلے نہیں ہون دتا۔ ایسے طرحاں پروفیسر واصف لطیف ہوراں ناز اوکاڑوی دیاں آزاد نظماں :اجوکا بیانیہ دے سرناویں ہیٹھ اپنے وچار قلمبند کیتے نیں۔ایہناں دسیا اے جے ناز اوکاڑوی ہوراں دیاں نظماں وچ اجوکے حالات دا سِدھا سادہ بیان سِدھے سادے انداز وچ پیش کیتا لگدا اے۔اوہناں نے آزاد نظم وچ پوری آزادی نال بِنا کسے ابہام توں اجوکا بیانیہ بھوویں انداز نال بیان کیتا اے۔
ناز اوکاڑوی ہوراں پوری دیانت داری نال اپنی سوچ تے فِکر نال اکھراں ایہ میحل سجایا اے۔ایہناں دیاں غزلاں وچ ادبی صنعتاں دا ورتارہ ،دھرتی دی بو باس ،وسیب دے منظر ،سماجی اوچ نیچ تےآپا دھاپی دے سارے نک نقشے وکھائی دیندے نیں ۔ ناز اوکاڑوی دیاں نظماں وچ پاکستانی سوچ غالب اے۔کجھ نظماں سماجی موضوعات ول وی جھاتی پاندیاں وکھائی دیندیاں نیں۔کجھ نظماں وچ طنز دے نشتر وی چلاۓ گۓ نیں ۔ ناز اوکاڑوی دی ایس کتاب ون سَولے پُھل وچ گیتاں دا لشکارہ وی بڑا پیارا اے۔گیت دی زبان سادہ ہوندی اے پر پیار محبت ہجر وچھوڑا تے سِکاں سانجھاں دے جزبیاں نال رنگی ہوئی ایہ شاعری دل تے وار کردی جاپدی اے۔ناز اوکاڑوی دے کلام وچوں کجھ مثالاں۔حمد شریف سبقت تیری وحدت تیری ۞ مافی دینا قدرت تیری نمونہ نعت جگ توں اُچی ذات محمدﷺ رحمت دی برسات محمد ﷺ مثال غزل کیہ کیہ کیتی یاراں نے پُھلاں نے تے خاراں نے ۞ سِر دے سودے کر کے ناز سر دتے سرداراں نے نمونہ نظم جیوے میرا ہاکستان ایہدی عزت توں قربان ایہدی جگ تے اچی شان کردی اے اقرار زبان ایہ وے میرا دین ایمان نمونہ گیت تیرے پِچھے ویکھ ماہی کتھے کتھے رُل گۓ تینوں یاد رکھیا تے ساریاں نوں بُھل گۓ ایہ سارے رنگ روپ ناز اوکاڑوی دی شاعری وچ تھاں جھکارے ماردے نیں۔