دسمبر 2021 دی 19 تریخ پنجابی تے اردو زبان دے سر کڈھ شاعر نصیر بلوچ اللہ نوں پیارے ہو گیۓ۔اوہناں دا وچھڑن اک قدرتی عمل اے۔انسان اللہ تعالی دی تخلیق اے۔زندگی موت اللہ تعالی دے قبضہ قدرت وچ اے۔ انسان اللہ تعالی دی منشا اگے بے بس اے۔ نصیر بلوچ اک استاد دے طور تے لوکاں دے دلاں وچ زندہ رہن گے۔ایہناں دی ذات دے بے شمار حوالے موجود نیں جیہڑے نصیر بلوچ دا ناں زندہ رکھن وچ اگیرے نیں۔ اک کامیاب شخص۔اک مہربان باپ۔اخلاق کردار دے پکے پیڈے۔یاراں دے یار۔ دکھیاں دے غمخوار۔لوکاں دیاں خوشیاں تے دلوں ہو کے مبارک دیون واے۔ نصیر بلوچ ہر اوکھے بھارے ویلے دوستاں دے مددگار ہوندے ۔مسلے مساٸل نوں سمجھدے ۔حق تے انصاف دی گل کر کے لوکاٸی دے دل جت لیندے ۔ ایہو تے اوہ صفتاں نیں جیہڑیاں نصیر بلوچ دی کامیاب زندگی دا بنیادی حوالہ نیں۔ نصیر بلوچ اک متحرک شخصیت دا نام اے۔اپنے شاگرداں نال انتاں دی محبت۔علمی تے ادبی طور تے اوہناں دی تربیت۔قدم قدم تے رہنماٸی۔برادری وچ اک نام کمایا۔ اپنے ہنس مکھ مزاج دے پاروں اگلے بندے دے من وچ تھاں بناون دا فن جان دے سن۔شگفتہ مزاجی وچ وی باکمال ۔گلاں باتاں وچ لطیف تے پیار بھرپن جیہا ورتارہ۔ ایہ سب خوبیاں نصیر بلوچ دے مزاج دا حصہ بن چکیاں سن۔آپ جیس وی پرھیا پنچاٸت وچ ہوندے سب دیاں نظراں وچ معتبر ٹھہراۓ جاندے۔اپنے علم تے دانش بھریاں گلاں سب دا دل موہ لیندیاں۔
نصیر بلوچ تے ایہناں دے ہونہار شاگرد تے عزیز ڈاکٹر اصغر بلوچ نال میرا باقاعدہ رابطہ 1989 وچ اودوں ہویا جد میں گورنمنٹ کالج جھنگ توں تبادلے دے بعد گونمنٹ کالج جڑانوالہ آیا۔اوسے دور وچ جڑانوالہ شہر وچ رفاقت حسین ممتاز دی شاعری جوبن تے سی۔ 1993 تیک میرا قیام جڑانوالہ رہیا۔ایس دوران گورنمنٹ کالج تے شہر وچ اکثر ادبی تقریبات وچ ایہ سارے سجن بیلی اکٹھے ہوندے۔ ایسے زمانے وچ مشہور ماہر تعلیم تے استاد شاعر بشیر حامد ادبی حلقیاں وچ بڑے مشہور سن۔ ڈاکٹر رشید گوریجہ تے جناب منظور عباس اظہر ادبی محفلاں منعقد کردے رہندے۔فیر ایس قافلے وچ عاشق علی فیصل وارث علی وارث راشد بلال تے کٸی ہور لکھاری ایس قبیلے دے فرد دے طور تے جان پہچان کراون لگ پیۓ۔ ایہ جڑانوالہ وچ علم ادب داسنہری دور سی۔ پنڈاں تھانواں وچ مشاعرےہوون لگ پیۓ۔نوجوان لکھاریاں دی اک وڈی گنتی جناب بشیر حامد ، رفاقت حسین ممتاز تے جناب نصیر بلوچ دی سنگت وچ ادبی پینڈے طے کرن لگ پیۓ۔
فیر اک زمانہ ایہ وی أیا جے نصیر بلوچ دا پنجابی شعری پراگہ تیرا ہجر گلاب جیہا شاٸع ہویا تاں ادبی حلقیاں وچ ایس کتاب دی رج کے سلاہنا ہوٸی ۔بہت سارے نویں پرانے لکھاریجناب نصیر بلوچ دے حلقہ ارادت وچ شامل ہوون لگ پیۓ۔ نصیر بلوچ ہن ساڈے ہتھوں نکلدا گیا۔ہن ننکانہ صاحب، لاہور ،اسلام آباد ،ساہیوال تے گجرات دیاں بزماں وچ نصیر بلوچ دا ناں گونجن لگ پیا۔ مہینے وچ چار چار پروگراماں وچ نصیر بلوچ آون جاون لگ پیۓ۔اپنے توں ودھ کے دوجے لکھاریاں دے کاج رچاون وچ ڈھیر مصروف ہو گیۓ۔اینے مصروف کہ اپنا اردو تے پنجابی کلام چھپوان بارے کدی وی کوشش نہیں کیتی۔میری اوہناں نال کٸی واری بحث ہوندی جے اپنا دوسرا شعری پراگہ وی سامنے لیاوو، پر اوہ کلام چھپوان دا وعدہ کر کے بھل جاندے۔ ایسے سجناپے وچ ایہ دن آ گیۓ کہ اسیں ایس قیمتی ہیرے توں محروم ہو گیۓ
نصیر بلوچ دے انتقال دے بعد ایہناں دے بیٹے، ڈاکٹر اصغر بلوچ تے ڈاکٹر مشتاق عادل کلام چھپوان وچ متحرک ہو گیۓنیں۔ نصیر صاحب دا کلام دھرتی دی واج اے۔ایہناں دا کلام فکر تے فن دے حوالےنال اک مضبوط بنیاداں تےکھڑا اے۔کلام چھپن نال بہت ساریاں نویاں راہواں اسرن گیاں۔اللہ تعالی نصیر بلوچ دیاں اگلیاں مزلاں آسان کرے۔رب دے بندے نے ہمیشہ بھلیاٸی دی گل ای کیتی۔
