پنجابی زبان وچ چھپن والے رسالے اُنگلیاں تے گِنے جا سکدے نیں ۔ویسے پنجابی دے نام تے تحریک چلاون والے دوستاں دا شمار کرنا مشکل اے۔ میڈیا تے دن رات پنجابی دے حقاں واسطے پوسٹاں لگانا شُغل بن کے رہ گیا اے۔پڑھن پڑھانا وی ناں دا رہ گیا اے۔جے پنجابی نال پیار کرن ولے سجن ای پنجابی زبان وچ چھپن والیاں کتاباں رسالے تے پنجابی اخباراں خرید کے نہ پڑھن گے تے فیر ایہ زبان ویلے دے نال نال کس طراں چل سکدی اے ۔ ٹھیک اے جے اپنی زبان دے تحظ تے حق حقوق واسطے باہر نکلنا پیندا اے ، پر ایہ سجن اپنا مزاج مِل ورتن تے رہن سہن پنجابیاں ورگا نہیں کردے۔ بیٹھکاں وچ کندھاں تے چنگیراں لٹکان نال کُجھ نہیں بن سکدا ۔ میں پنجابی زبان دے بڑے بڑے دعوے داراں,دے کول جا کے ویکھیا اے، کسے کول اپنی ذاتی لائبریری نہیں۔کسے پاسے توں کوئی کتاب فری مل گئی تے رکھ لئی۔اپنی کمائی دی یا,اپنا پلہ لا کے کوئی وی کتاب رسالہ یا,اخبار نہیں خریدیا جاندا۔ جے زبان نال وابستہ افراد پنجابی توں دور بھجن گے تے زبان نال پیار محبت تے,ایس دی علمی طور تے ترقی نا ممکن ہو جاوے گی،کیوں جے عام لوکائی دا تے پنجابی زبان مسلہ ای نہیں ۔
ونگاں دے ایس پراگے وچ زاہد حسن دیاں دو کہانیاں شامل نیں۔زاہد حسن کہانی دے حوالے نال اک معتبر نام اے۔ ایس شمارے وچ کہانی لکھن والے دوجے لکھاریاں وچ توقیر چغتائی اے جنھاں دی کہانی ہڈیاں اٹک دے مخصوص لہجے وچ لکھی گئی اے۔توقیر چغتائی ادب تے صحافت دے مان تران لکھاری نیں۔کشمیر دی آزادی دی تحریک دے پس منظر وچ محمد ارسلان صادق دا افسانہ کشمیر ساڈا اے بڑی محنت نال لکھیا گیا,اے پر رسالے وچ غلطی نال راقم دے ناں تے شائع ہویا اے۔راقم دا قصور ایہ اے جے ایہ افسانہ میرے ای میل توں بھیجیا گیا سی۔ ڈاکٹر ثوبیہ اسلم ہوراں غیر ملکی کہانی شہد دا اک قطرہ دا پنجابی زبان وچ بڑا نرول تے رواں زبان وچ ترجمہ کیتا ۔ فہرست وچ ایہناں دا ناں ثوبیہ ملک لکھ دتا گیا اے۔فہرست دی تیاری یا ترتیب ذمہ داری دا تقاضہ کردی اے۔
ملک ارشد سیماب اٹک دے عالم فاضل نیں ۔اردو پنجابی دونہاں زباناں وچ تحقیق تے تنقید دے پینڈیاں دے راہی نیں۔ایہناں دی کہانی جنج معاشرے دی عکاسی کردی نظر آندی اے۔ آغا جہانگیر بخاری دی لکھت پبّاں بھار حیاتی سوہنی تحریر اے پر جے ایس نوں ودھا کے لکھیا جاندا تاں ایہ اک خوبصورت انشائیہ بن جانا سی۔ ونگاں دے صفحہ 30 تے اچیچی رلت دے سرناویں نال شاعر محقق تے نقاد طاہر اسیر ہوراں دا بھرواں تعارف کرایا گیا اے۔ایہ صاحب پنجابی دے کیمبل پوری لہجے بارے بڑی محنت نال مواد اکٹھا کردے پئے نیں۔2017 وچ ایہناں دی تیار کردہ پنجابی لغت کیمبل پوری لہجہ شائع ہو کے ہر پاسے توں پزیرائی حاصل کر چکی اے ۔طاہر اسیر ہوری ایس توں اگیرے اکھان محاورے تے لوک ادب نوں سانبھن دا جتن کر رہے نیں۔تعارف دے نال نال ایہناں دیاں کجھ نظماں وی دتیاں گیئاں نیں،سگوں ایہناں نظماں دا برابر دے صفحے تے گورمکھی انگ وی دتا گیا اے۔میری دعا اے جے طاہر اسیر دے جزبے ہور پروان چڑھن ۔
ونگاں دے ایسے شمارے وچ معروف لکھیارن عذرا وقار دی ہڈ بیتی بارےجناب سعید احمد ہوراں بھرواں جائزہ لیا اے۔ ایس ہڈ بیتی وچ عذرا وقار دے قلم وچوں نکلے آفاقی جملیاں نوں اک تھاں اکٹھا کر کے رکھ دتا اے۔ ونگاں وچ شاعری دا حصہ وی بڑیاں جاندار تے معیاری لکھتاں دا مجموعہ اے ۔ایس حصے وچ معروف لکھاری تے رسالہ ونگاں دے سرپرست جناب مشتاق عاجز دیاں لکھیاں بولیاں شامل نیں۔ایس توں وکھ قصور مبارک بٹ ، توقیر چغتائی ،عاصم پڑھیار ،سخاوت بخاری، رمضان شاہد، صغیر تبسم ، نصرت بخاری ،شازیہ اکبر ، نزیر سانول، سعادت حسن آس ،حسین امجد ، نجم الثاقب ،فرخندہ جبیں ، ثقلین انجم ، ڈاکٹر ارشد محمود ناشاد، سید حامد شاہ بخاری، احسان رانا ،ادریس چیمہ ،محمد ظہیر احمد، نزیر عباس ،خاور وحید ،اقبال اشعر ،عمران نادم، حیدر علی حیدر ، فیصل منظور کیفی تےچشوکت کمال رانا دا کلام شامل اے۔ ونگاں دے ایس شمارے در سرپرست جناب مشتاق عاجز ،مدیر اعلی جناب ثقلین انجم نیں۔مجلس مشوارت وچ سید نصرت بخاری ،جناب طاہر اسیر تے جناب حسین امجد ورگے ودوان شامل نیں ۔ظاہر اے جے ودھیا مونہہ مہاندرے تے بہتر توں بہتر لکھتاں نال چھپن والہ رسالہ مہان لکھاریاں دی ٹیم دء محنت تے کوشش دے بغیر شائع ہونا محال اے۔
