پنجابی زبان وچ ہر سال نظم تے نثر دیاں کتاباں چھپدیاں رہندیاں نیں۔کتاب چھاپنا بہت مہنگا سودا بن گیا اے۔کتاب ویچن دا وی کوئی سربندھ نہیں ہو سکدا۔صرف دل نوں راضی کرن واسطے ایہ کوڑا گُھٹ برداشت کرنا پیندا اے۔ ایس ویلے میرے سامنے پروفیسر صفدر علی شاہ ہوراں دی کتاب پُھلاں دی خُشبو موجود اے۔موصوف میرے جھنگ دے زمانے دے بیلی نیں۔گورنمنٹ پوسٹ گریجوایٹ کالج جھنگ وچ شعبہ اردو وچ استاد رہے۔ایتھوں ای ریٹائر ہوۓ۔ایہناں دیاں اردو وچ چھپیاں تن کتاباں ذوق جستجو 2009، خوش فکر شاعرـخضر تمیمی 2010 تے جہان فہم 2016 ادبی حلقیاں وچوں مانتا پَتر کھٹ چُکیاں نیں۔ پُھلاں دی خشبو ایہناں دے پنجابی زبان وچ لکھے کھوج پرکھ لیکھ نیں۔222 صفحیاں تے مشمل ایس پراگے وچ شامل لیکھ ایس طراں نیں۔ ۞پنجابی زبان دی ٹور ۞دیس پنجاب دا لوک رنگ ۞ حضرت سلطان باہو دی حیاتی دے گوہڑے بھیت ۞حضرت ہیر مہر علی شاہ گولڑوی دا سُچا روپ ۞ھو دے بیت ممتاز بلوچ دا ویروا ۞تصور سبز گنبد دا ریاض قادری دیاں مہکاں ۞ چِڑیاں بول پئیاں مستان علی جاوید دی مُکھ وکھالی ۞ ناول سکینہ فوزیہ رفیق تے نِکی جیہئ جھات ۞ پلکاں ہیٹھ چنہاں صابر سودائی دا نتارا ۞ نیناں دی ملہار ارشاد سجوکا دیاں چمکاں ۔ ایس کتاب دا اک بھرواں لیکھ ۞ًسلاہن جوگ لکھتاں دیاں رسیداں ً نیں۔ ایس مضمون وچ پروفیسر صفدر علی شاہ ہوراں اوہناں لکھتاں بارے چانن پایا اے جیہڑیاں کجھ ورھے ہہلاں اوہناں دے مطالع وچ رہیاں۔ایہناں لکھتاں بارے اوہناں بڑی سِکہ بند تنقید وی کیتی اے تے تے تجزیہ وی بھرویں اکھراں وچ کیتا اے۔ایس مختصر پر معیاری تنقید وچ زیر بحث آون والے لکھاریاں وچ ابرار حسین اکبر، اخلاق عاطف، حنیف باوا ،سجاد بخاری ،سعدیہ حمید ، پروفیسر شفقت رسول ، پروفیسر شفیع ہمدم ، ڈاکٹر گل عباس اعوان ،مہر گل محمد ، مجاہد حسین خاور ، ڈاکٹر محسن مگھیانہ ،آزاد کشمیر دے لکھاری پروفیسر محمد اکرم طاہر ،ڈاکٹر محمد سعید خاور بھٹہ، محمد شفیع منظر، محمد عبداللہ عاصی ،ممتاز بلوچ ،محمد نواز ایمن، اک جزباتی نوجوان نزیر احمد ارمان، نسیم عباس ناصر تے یعقوب ابوالخیری ۔ پروفیسر صفدر علی شاہ ہوراں اپنی تنقیدی اکھ نال ایہناں سرناویاں تے کُھل کے لکھیا اے۔جتھے اوہناں نوں اختلاف دا پہلو نظر,آیا اے اوہناں بغیر کسے رکھ رکھاؤ تے سِدھی تے کھری کھری گل کیتی اے۔ایہو کسے نقاد دی وڈیائی ہوندی اے جے اوہ انصاف دا پلڑا ڈِگن نہ دیوے۔ پروفیسر صفدر علی شاہ ادب دے منے پرمنے نقاد نیں۔اوہناں دی سوچ تعمیری تے اصلاحی ہوندی اے۔جھنگ رنگ دیاں ادبی سرگرمیاں اوہناں دی نگاہ وچ ہوندیاں نیں۔ پر پنجابی ادب دی مجموئی صورت حال توں اوہ چنگی طرح جانوں نیں۔ پھُلاں دی خشبو اک وڈا ادبی معرکہ اے جیس دی اشاعت اُتے جھنگ تے پنجابی دے سارے ادبی حلقے ایہناں دی ایس کاوش تے خوش نظر آؤندے نیں۔تنقید دے حوالے نال ڈھیر کم کرن دی ضرورت اے۔جیس روانی نال فاضل نقاد نے ادب دی موجودہ رفتار تے سیر حاصل بحث کیتی اے ،ایس توں محسوس ہوندا اے جے پروفیسر صفدر علی شاہ ہوراں دا قلم کسے ہور ادبی معرکے دا تانا بانا بُنن وچ رُجھ گیا اے۔
